Heb 11 | NAS | STEP | Enang tee tee masikaꞌanta tee eeꞌnung tee biraanke nempampimaung-koo okoraꞌnooꞌ deempari otong, tee eeꞌnung noruꞌ purintoꞌ tasiꞌanta-koong tee kapooꞌ oroꞌparavaung.

Hebrews 11

Niiꞌke Kumponing Masikaꞌantavampiri Bauring-koo Imaꞌmariai

(11:1–13:25)

Aꞌ Teꞌ Masikaꞌanta-koo Okoraꞌnooꞌ

1 Enang tee tee masikaꞌanta tee eeꞌnung tee biraanke nempampimaung-koo okoraꞌnooꞌ deempari otong, tee eeꞌnung noruꞌ purintoꞌ tasiꞌanta-koong tee kapooꞌ oroꞌparavaung. 2 Teing urikupoong koontoꞌnuka Kumponinge tampeng tampuruꞌ tee-koo masikaꞌantavauꞌnung-koo.

3 Tee ninka masikaꞌanta ninka Kumponinge naumuriko tasiꞌpamping eeꞌnarai paning eeꞌnoko kansiꞌ eeꞌnoko ookara bateinananka nariꞌ bakaang kara ninka pupuꞌuuꞌ, bera aaꞌnouꞌ teing kapooꞌ ooampimaing tavoꞌaruꞌ kapooꞌ ooampiaing-eta.

Eebeloꞌ Dovange Inoke Eeꞌnoko Nooaꞌ Masikaꞌantavaakoꞌnaꞌ

4 Eebeloꞌke tee ninka masikaꞌanta ninka boontunang tampara avuuꞌ Kumponing, Keeni bakaang puruꞌui. Eeꞌnoko Kumponinge bakaang masikaꞌanta-koo oovura makosi-antavuuꞌ naning koontoꞌ tang-koo, bakaang boontunang makotuioꞌ taaꞌniꞌantavuma. Bane booꞌparuꞌ, nka teie bakaang masikaꞌantai tee mmeꞌ karoi otong.

5 Iinokei tampaꞌ masikaꞌantavuioꞌ Kumponinge deto paning-koo nkavuuꞌ booꞌ toraꞌpuaruuꞌnaꞌ. Besiꞌaama ooaavaꞌ Kumponinge nkavuioꞌ tee. Tenang tutung nkavuaꞌ Kumponinge tee siraꞌpuuꞌ Iinokei tee dotu-antavuuꞌnung. 6 Eeꞌnoko naninge masikaꞌanta otoaꞌ Kumponing dotu-antavuarupeuꞌ. Baa tee naning Kumponing-koo dueꞌaravainge teie tee aing aaꞌning tutung masikaꞌantavuaing: Kumponing tee otong, eeꞌnoko teie tee tampaꞌ mooꞌuriaing teing nantoong tee besiꞌaamaing kakeꞌiiariri.

7 Napoꞌ Nooaꞌ teeꞌke, Kumponing-koo meeꞌduꞌpiari teie kara masikaꞌantavura aakaꞌnareng taꞌnampuuꞌ tee baurukaaꞌ ninka domampariiꞌnaang, Kumponinge siingoravuioꞌ kapooꞌkoo mmeꞌ oroꞌparavaung-koo. Nooaꞌke teeꞌ nkoarama ookara nantoong kansiꞌkoo-nupoong kiimata-koo-nupoong siraꞌpuruꞌ. Eeꞌnoko Kumponinge tee naning koontoꞌ tampuuꞌ, barenku-pinaꞌ miruꞌui masikaꞌantavuko oovura.

Eebaraamiꞌdaringe Seeraꞌ Kumponing Masikaꞌantavurekoꞌnaꞌ

8 Eebaraamiꞌ teeꞌ nariꞌke, masikaꞌanta-poꞌnung. Teeꞌkoo Kumponinge bokuvura niiꞌnooꞌaape teꞌ tokoo maraka-antavuuꞌnooꞌ tee avuuꞌnaang botovuioꞌ meumpura tenkenuuꞌ tamung noruꞌuaꞌ tokoo beainooꞌ. 9 Teketa tee ninka masikaꞌanta narung ninka damisimaiari otouꞌ temeensiꞌkoo maraka-antavuuꞌnameensiꞌkoo, akokameensiꞌpinaꞌ noruꞌuma, kaandesi-koo kaniarama nanukoꞌ. Eeꞌnoko bauring Aisakeꞌ teeꞌke, napoꞌ tee Jeekopiꞌ baꞌdompeng nariꞌ barenku okonakang Eebaraamiꞌ ninka maraka-antavuruꞌnakang deempariri. 10 Aiꞌ teie tee uroꞌkanooꞌka oovukoꞌ temono osi pankamono eꞌmanui otoꞌnamono Kumponinge kanivuuꞌnamono.

11 Eeꞌnoko napoꞌ Seeraꞌke tee ninka masikaꞌanta ninka iriꞌ nkavuuꞌ tootoꞌ keꞌde-koo poontoaraaꞌnaang bane teni eeꞌnani pareaamanooꞌ divuꞌke, eeꞌnoko tenie tee maraka Kumponinge daamparavaunge avuuꞌnung-koo arooꞌari bauring tampaꞌ paravuuꞌ. 12 Tee tee naning narung-eta baruꞌ aaꞌnaꞌ pankara-ita nantoong karinga berempariruꞌ mmauꞌnooꞌ beentoꞌnanka paning-kooning-pinaꞌ, eeꞌnoko napoꞌ piisiꞌnanka pirung tapirue otoromaing-pinaꞌ deeru-paaꞌnanka, teeꞌ nariꞌ Kumponinge napoꞌ maraka-antavuuꞌnaꞌ.

13 Teka teing aing ookara mmeꞌ masikaꞌantavai boorouꞌ kapooꞌ tee maraka-antavuruꞌnung ooaavaꞌ, teka tamung isipoꞌketa nuuruupiaama aaꞌnaꞌ dotuarikoꞌ kansiꞌkoo damisimainku siraꞌpariri kiimata-nupoong-pinaꞌ otoroi, osikaiaampuripeuꞌnaꞌ paaravariaꞌ. 14 Aiꞌ teing temuriiꞌ nantoong teeꞌ siraꞌpaarimaing tee teing tasiꞌpariri otorong osi niiꞌnooꞌ datavoroi otoroainooꞌ besiꞌaama. 15 Teꞌ osi porouꞌnooꞌ norunoruꞌaavaꞌ. Norunoruꞌai dei tee napoꞌ doona ooaapeuꞌ toro-koong. 16 Teka tee teꞌnooꞌ osi tampooꞌ otoꞌkoo piavoromaing, teꞌ eeꞌnooꞌ paning-koonooꞌ. Teeꞌ masikaꞌ noruꞌampiri otong teie osi pankaing maamu-antaevuruꞌnung-koo.

17 Napoꞌ teeꞌke tee Eebaraamiꞌ bakaang masikaꞌanta ninka boontunampuuꞌ tee bauring narung masikung kirokai Aisakeꞌ Kumponinge paaravuioꞌ; 18 Tero tee Kumponinge Eebaraamiꞌ maraka-antavuma aaꞌpuuꞌ,

“Aisakeꞌ baurukaaꞌ teing daꞌ okoruining tamparampaining.”
(Pupuꞌ 21:12)

19 Eeꞌnoko damaꞌke Kumponinge paaravuko tee Eebaraamiꞌ arooꞌaruꞌ tee baka bauring boontuvuuꞌnaang, eeꞌpinaꞌ noruꞌuma, “Kumponinge tee nantoong napoꞌ domang-anta-koo makosi, bane booꞌnuka.” Eeꞌnoko masikaꞌ Eebaraamiꞌke bauring booꞌketa nkavuuꞌnung-pinaꞌ otong.

Aisakeꞌ Dovange Jeekopiꞌ Eeꞌnoko Josepaꞌ Masikaꞌantavaakoꞌnaꞌ

20 Napoꞌ teeꞌke teie Aisakeꞌke Kumponinge nauvuioꞌ masikaꞌantavura baurinketa Kumponinge biraankevureainaꞌ nauvuretuꞌ, temainta Jeekopiꞌ namainta Iiso.

21 Napoꞌ teeꞌke teie Jeekopiꞌke booꞌke dueꞌura Kumponinge maraka-antavuuꞌnaꞌ masikaꞌantavui Josepaꞌ baurinketa kante Kumponinge biraankevureainaꞌ nauvuretuꞌ, donsiꞌkoo doonsinuꞌari doonko kinkinura dootuuꞌarama.

22 Napoꞌ teeꞌke teie Josepaꞌke masikaꞌantavuuꞌ tee Kumponing bakaang maraka-anta Isireeli-nupoong tenkenaavainaꞌ Iisipiꞌketa teꞌ maraka-antavuruꞌnooꞌ osi, eeꞌnoko tenang booꞌke dueꞌura tee maraka-anta masikaꞌantavui minkuarama botoaruꞌ dakoꞌaavaꞌnaang teꞌ Kumponinge beꞌantavuriainooꞌ.

Moosesi Eeꞌnoko Baumararing Ninka Nariꞌ Masikaꞌantavaakoꞌnaꞌ

23 Moosesi baumararing teeꞌke, bane dauraronge~ toireꞌ donkaang tavuꞌkoo botovurikoꞌnang teringe avororeaꞌ bakuꞌuresi otokoꞌ beekuri kaara-koo tee tootoꞌ kirokai oovureta pontoꞌarioꞌ Kumponing bakaang biraanke masikaꞌantavuresi.

24 Napoꞌ Moosesie teeꞌ nariꞌke, Juꞌnupoong biikaang biraanke damaꞌnung masikaꞌantavui tee bane Peeroꞌ baurange bauring deempuko, teka tenang pankaꞌparara orokoarakoꞌ. 25 Kumponing bakaning ninka nariꞌ arikung toraꞌkoo piavora tee-koo orara aarumo-koo kuunge batei okiꞌnamuꞌkoo otoi dotuaraaꞌnaang piavoarukoꞌ, 26 eeꞌ noruꞌuma: baruꞌ Kumponing bakaang Pakoꞌpariꞌniiꞌ nempui baike kuneꞌkoo tampaꞌ masikaꞌ tee barenku nkavupeuꞌnung Iisipiꞌnunge dauraronge deing puruꞌui otong mooꞌ damaꞌke nkavuaing noruꞌui.

27 Napoꞌ teeꞌke tee biraanke masikaꞌantavui Moosesi Iisipiꞌketa tenkenuuꞌ avoroaꞌ tee-koo daurarong bakaang iira-koo, eeꞌnoko teke teeꞌ nariꞌ masikeevui otokoꞌ Kumponing oo-paaꞌ dutai oovuing-pinaꞌ otoi. 28 Eeꞌnoko damaꞌke napoꞌ Kumponinge tenkeng-antavuriainaꞌ nauvuioꞌ Moosesie masikaꞌantavura tee Paroro Baariꞌkoong~ nkovuuꞌ erenge karanaang siinkiaama tee koosinung~ booꞌkoonge biurukaaꞌ donkaang tutunaꞌnupoong kompuriarooꞌnaang Iisipiꞌnupoong biurukaaꞌ besiꞌurima.

Isireeli-nupoonge Mmauꞌke Masikaꞌantavaakoꞌnaꞌ

29 Napoꞌ teing Isireeli-nupoonge naroꞌke Kumponinge barampurioꞌ masikaꞌantavai tee pirung miring Urung pakoꞌauꞌ kansiꞌpinaꞌ koverenooꞌke kato, teka teing Iisipiꞌkooning kare-nupoong bataꞌaarima teeꞌ nariꞌ pakoꞌkoo paaravaama teke keꞌnuruꞌariruꞌ.

30 Napoꞌ teeꞌ nariꞌ Kumponinge botovuruꞌnaꞌ masikaꞌantavai Jerikooꞌnung parang ~keꞌmunta-taa doonge koroaioꞌ pesiꞌaruꞌ.

31 Eeꞌnoko tenie oranie Reeapiꞌke teeꞌ, masikaꞌantavura booaruuꞌ teing ninka bakanariong Jerikooꞌnupoong ninka taarapiikanuka ninka nariꞌ, teni domang-anta piavora tenaanka tapoka nkora Isireeli-koonaanka onkeonkeꞌureta pakuvuretuꞌnooꞌkoo.

32 Eeꞌnoko aming kapooꞌ niiꞌnung minkuamaꞌnaang? Aiꞌ bateinang baruꞌ makotuaꞌ aing aaꞌning minku-koong: Kidion, Barak, Samson, Jeptaꞌ, Deevitaꞌ naanka eeꞌnoko Samuelaꞌ, eeꞌnoko teing niiꞌning nakaro-nupoong~ Kumponing bakaning. 33 Teinge Kumponing masikaꞌantavaama dauraronanka mmauꞌ depetoaaruꞌnung, nantoong orenanka etuaarima koong-antavaaruꞌ. Kapooꞌ Kumponinge teing-koo maraka-antavuuꞌning kompauꞌ. Laioni-nanka-koo karang avoꞌaaruꞌ. 34 Teinge ntaꞌ karauviaana sirivaaꞌauꞌ. Bainatu-koo iꞌang-eta tampaꞌ mmariauꞌ. Bane aruaruꞌnukai teka paaravaama teinge apooꞌaarikoꞌ. Tavuꞌkoo iirakutavarikoꞌ eeꞌnoko damisimainku piatooronuka~ mmariꞌantavaarikoꞌ. 35 Niiꞌning manikuꞌ dotuarikoꞌ biikaning boorouꞌning domampariko.

Eeꞌnoko napoꞌ niiꞌning-koo teinge tooꞌde-nupoonge orakaꞌ nariꞌ otoꞌkoo etuaariko teing koontoꞌ arooꞌariaꞌ, teka baike toraꞌkoo tauraꞌparikoꞌ booꞌketa daaꞌarima tampara otootoꞌkoo otoroainaꞌ noruꞌariri. 36 Teing-koo niiꞌninge aing aaꞌning toraꞌpaakoꞌ: akapeuꞌ, muraꞌ, daiꞌdovampaarima kiimatavaarikoꞌ. 37 Kapange tooꞌpaarima dupisiꞌaarikoꞌ, sooꞌke meuꞌ keꞌmeꞌaarikoꞌ, bainatu dovange dupisiꞌaarima. Ataꞌaama sipisipiꞌ dovang-koong meeꞌmeeꞌ dopaꞌ kurumpariri nanaakoꞌning orakaꞌ nkoaarima poreꞌantavaarikoꞌ. 38 Teing baruꞌ aaꞌnaꞌ tampeng anke kansiꞌkoo osikaiaang ninka nariꞌ otoꞌkoo, makotuaꞌ. Teeꞌkoo avitoitoi nanaama aaꞌning-koo otorokoꞌ: meeꞌboraꞌ sirakamaaꞌkoo, miinairu-koo, kumpenairu-koo eeꞌnoko kuvinairu-koo anke kansiꞌkoo.

39 Teka bane teing baito-koo miring-poꞌnupoong, teka teinge tee nkavaavaꞌ ookara kapooꞌ Kumponinge maraka-antavuuꞌnung. 40 Teka tee Kumponinge tampaꞌ masikaꞌ oꞌnoriainaꞌ uroꞌkanooꞌka noruꞌui teinge tutung opai nka-koo tauraꞌpuriaruuꞌ niiꞌ ninka nariꞌ nkavampiaing deemparako.